أتمنى أعمل فى مجال تصميم المعارك فى أفلام الأكشن
“أحمد سعيد” مدرب فنون قتالية يبلغ من العمر 38 سنة، استمر لمدة ٣٠ سنة فى مجال الفنون القتالية زى الكونغ فو، الكيك بوكسينج، mma، جيوجيتسو.
شارك في أكثر من عمل فني مع أحمد مكي، آخرهم مسلسل الغاوي.
وفى حوار حوار خاص مع الكابتن “أحمد سعيد”، وكان نص الحوار كالآتي..
عرفنا أكتر عن نفسك ؟
أنا مدرب فنون قتالية زى ماقولت، وكمان مدرب باركور .. رياضة الباركور ديه لعبة عسكرية شوية بتعتمد على التسلق واجتياز الحواجز والنط من مسافات عالية للأرض بدون أى إصابات.
كلمنا عن العمل مع أحمد مكي ؟
اشتغلت مع مكى ٣ مسلسلات: الكبير ، الاختيار ، وآخر مسلسل كان الغاوى، الشغل مع مكى مش بيكون كتير؛ لأنه بيعمل معظم المشاهد بنفسه، إلا إذا كان مصابًا مثلًا زى المسلسل الأخير وده اكتر مسلسل اشتغلت فيه معاه.
ليه اخترت شغل الدوبلير رغم أنه خطر ؟
أنا مدرب فنون قتالية، وهذا أكسبني خبرة عالية فى مجال الأكشن مثل مشهد نطة من مكان لمكان والمسافة كبيرة طبعًا، الممثل مش محترف ومش هيقدر يعمل مشهد زى ده، ساعتها يجى دور الدوبلير هنا.
مثلًا مشهد تانى مطلوب إن الممثل هيتخبط بعربية برضوه خطر إن الممثل يعملها بنفسه؛ لأنه مش هيكون عنده خبرة ياخد الخبطة فين، و ينزل على أى جزء فى العربية ويقع إزاى على الأرض بدون أى إصابات، وطبعًا ده فى وجود سيفتى كامل للجسم.
إيه أصعب حركة عملتها ؟
أصعب حركة عملتها فى المجال ده كانت خبطة عربية فى فيلم كازابلانكا كنت عامل دوبلير الفنان التركى خالد ارغانش، وكان طالع فى الفيلم بدور شخصية الخواجة.
بتستعد إزاى قبل ما تقدم مشاهد النط والضرب ؟
الاستعداد بيكون طبعا إحماء كويس جدا علشان كل ما كان الاحماء كويس كان مكان الأداء احترافى اكتر ، ولو المشهد محتاج سيفتى بلبسه تحت الهدوم؛ وببدأ أعاين المكان اللى هتتعمل فيه الحركة، وأمن عليه كويس جدًا، وأعمل أكتر من بروفة علشان أحس بالحركة قبل ما أعملها.
إيه رأيك في الفنانين اللى بتعمل المشاهد دي بنفسها زي السقا والعوضي؟
الفنانين اللى بيعملوا المشاهد بنفسهم طبعا دى حاجة جميلة جدًا، بس فى خطوره أولًا على الممثل لأنه فى الأول والآخر مش متخصص وليه limit ، فلو عنيد وقرر إنه يعمل حركة خطيرة فهو بيعرض نفسه للخطر، وبيعرض العمل كله للتعطيل؛ لأنه لو لا قدر الله اتصاب “وده احتمال وارد جدًا لأنه زى ما قولت مش متخصص”؛ كده الفيلم أو المسلسل هيتعطل لحد ما الفنان يتعالج، والله أعلم علاجه هياخد وقت قد إيه بقه، كمان الدوبلير بيكون محترف وده بيدى المخرج أو مصمم المعارك فرصة كويسة جدًا إنه يصمم عملًا قويًا، وفى مشاهد تشد المشاهد.
https://www.instagram.com/p/CNyhvMsFkHq/?igsh=MWd6OGIxcHBzMzViYQ==
إيه الحاجة اللي نفسك تحققها في مجال التمثيل ؟
بالنسبة إلى أنا حابب أتعمق أكثر فى مجال الأكشن وتصميم المعارك؛ لأن الجزء ده فى مصر مش أحسن حاجة، مع إن عندنا مستويات ممتازة لو استعنا بها فى أى عمل هتعمل طفرة فى مجال الأكشن في مصر.
اكتشاف المزيد من الاتحاد الدولى للصحافة العربية
اشترك للحصول على أحدث التدوينات المرسلة إلى بريدك الإلكتروني.
