فساد وعدم رقابة المستشفيات العام بمصر
كان ومازال وسيظل
إلى متى الله أعلم
سنرى قصة حقيقة ترويها أم وما حدث مع ابنها ، كما هى دون خذف أو إضافة أو تعديل
لك الله يا مصر
المكان مستشفى القاهرة الجديدة
القصة
يوم الاثنين الماضي (سيف) راح التمرين بتاعه ، بعد التمرين الكابتن قاله انه هيدخل تمرين فيتنيس (فسيف) قعد ينتظر الكابتن ، راح ولد ميعرفوش أخد حاجة من متعلقات (سيف) وجرى فمن الطبيعي ان (سيف) يقوم يجرى وراه عشان يسترد حاجته فداس على حديدة في الأرض قطعت الكروكس ودخلت في رجله من تحت .
جرى مسؤول النشاط الرياضي أخده وراح بيه على مستشفى القاهرة الجديدة طوارئ .
(وكلموني) بعدها بشويتين كده قال عشان متخضش .
نزلت جرى على المستشفى وصلت لقيتهم بيقولولي ممنوع الدخول ( تقريبا كل اللى يشوف وشي لازم يقولى ممنوع ) المهم زعقت فيهم وقولتلهم ابنى جوة راحوا فتحولي البوابة الخارجية بعد محادثات طبعا
دخلت ووصلت للطوارئ لقيت الباب مقفول قعدت أخبط لحد لما جالى واحد وقالى تعالى الباب الجانبي رحت ادخل قالولى ممنوع وهنا لم أتمالك نفسي قعدت أزعق فيهم يعنى ايه ممنوع يعنى اكون في البيت وابنى في التمرين بدل ما يرجع البيت ألاقي حد يكلمنى ويقولى روحيله المستشفي رجله اتفتحت وتيجي انت تقولى ممنوع
يرد ويقولى احنا عملنا اللازم قولتله اللازم لإيه أنا لازم أدخل وأعرف حالته ايه واطمن عليه يرد ويقولى ممنوع واحنا عملنا اللازم والدكتورة بتتابعه سألت اللى أخده المستشفى ايه اللى حصل قالى حديدة دخلت رجله رحت قايلة ليهم واللازم ده شمل حقنة تيتانوس قالى الدكتورة أعطته كل حاجة في المحلول
( هو من امتى التيتانوس بتتاخد في المحلول !!)
ومع زعيقي راح شاورلي على واحدة قاعدة في الباركينج بتتكلم في التليفون وقالى اللى هناك دى الدكتورة استنيها تخلص تليفون وبعدين اسأليها
انتظرت ربع ساعة وبعدها قامت وهيا لسه بتتكلم في التليفون وهتدخل قمت وقفتها وقولتلها لو سمحتى عايزة أعرف حالة سيف الدين قالتلى لسه منتظرين نتيجة السونار وال cbc ودخلت فورا وقفلوا الباب ومطلعش حد الا بعد عشر دقايق قضيتهم في محاولة فهم ليه سونار و cbc لو هو جرح صغير واتخيط زى ما اتقال لى في التليفون؟
بعدها طلع الراجل اللى شاورلى على الدكتورة فبسأله عن اللى قالته قالى لا دول خاصين بالحالة اللى عندها الزايدة قولتله هيا الدكتورة كمان مش عارفة حالة اللى بتتابعهم مهي هتركز ازاى وهيا مقضياها تليفونات !!
قالى والله اطمنى ده أنا بنفسي اللى معلق له المحاليل قولتله ليه محاليل!!
وطبعا أكيد توقعتوا الرد اللى كان لازمة على لسانهم ” احنا عملنا اللازم ” ..
اللى رافق سيف للمستشفي قالى انهم اعطوه كيس فيه متعلقاته ووضعها في شنطته قولتله تمام ، بعدها طلعوا (سيف) على كرسي متحرك واللى طالع معاه أمن البوابة بيقولى حمدلله عالسلامة، قولتله حمدلله عالسلامة!!!!
هيا الدكتورة كمان مش هتطلع تعرفنى كان في ايه واتعمل له ايه ؟
قالى الدكتورة مش بتطلع لحد قولتله طب بالنسبة للتعليمات؟ قالى يعنى ياكل كويس ويرتاح قولتله هو حضرتك فاكرها حالة ولادة هتقول للوالدة تاكلي كويس وترتاحي ؟!
قولتله طب بالنسبة للجرح قالى بعد اسبوع تفكى السلك ، قولتله طب وخلال الاسبوع مفيش حاجة اسمها غيار عالجرح؟!
صوت صرصور الحقل
قولتله طب بالنسبة لان في حاجة اسمها روشتة أو أدوية ياخدها ؟! قالى عايزة نصيحتي قولتله نعم خير ، قالى روحى اكشفي له برة والدكتور يطمنك وقفل الباب حتى موصلش سيف للعربية رغم أنها تبعد عن الباب مقدار ٣ عربيات أخد الكرسي وقفل الباب
وقعد سيف ينط على رجل واحدة لحد لما وصلنا للعربية ، الساعة كانت ١١ بالليل طيب أعمل إيه مهو مش هينفع يروح أى مكان ولا اعرف ياخد علاج ايه رحت الصيدليه جبت العلاج اللازم – زى عملنا اللازم كده مهى عدوة بقي
ورجعنا البيت
اكل واخد علاجه ورحت أفرغ محتويات شنطته وطلعت الشنطة اللى سلموها للمرافق في المستشفى ووقفت تنحت قدامها وبعدين صورتها وفتحتها لقيتها عبارة عن فردة الكروكس وقطع دم متجلط قد كف اليد ومقدار كوب دم سايل في الشنطة
ده بس على ما قلعوه الكروكس وحطوه فيها فمابالكم بقي وهما بالقدر ده من الإهمال وعشان كده اتعلق له محاليل
رحت تانى يوم المستشفى اطلب تقرير مفصل بحالته قالولى تعالى بكرة رحت اليوم اللى بعده قالولى تعالى بعد اسبوع قولتلهم انا عايزة أقدم التقرير لانه عنده امتحان في النادى وعايزة أأجله قالولى هو ده اللى عندنا مش عاجبك روحى للمديرة
رحت لمديرة الطوارئ وقولتلها حصل كذا كذا كذا راحت تشوف الدفاتر ورجعت معاها ورقة عشان توضح اللى اتعمل له ، قالتلى الدكتورة علقتله محلول ملح لانه كان عنده هبوط شديد واخد حقنة كذا وحقنة كذا دول مسكن قولتلها بس؟
قالتلى اه قولتلها انتى عارفه ان إصابته بسبب حديدة دخلت رجله يعنى المفروض كان ياخد تيتانوس قالتلى اه طبعا قولتلها وانا سألتهم تحديدا عنها قالوا اخدها قالتلى لا مأخدهاش
قولتلها على فكره زوجى صحفي عضو نقابة الصحفيين وأنا تواصلت مع المسؤول عن مخاطبة القطاع الطبي بس محبتش اعمل مشكلة قبل ما اشوفكم
قالتلى متقلقيش انا هجيبلك حقك
دخلت مكتبها كتبت تقرير مفصل فعلا بالحالة واللى اتعمل معاه وبعدين بتعرضه على دكتور عظام أظن أنه يعلوها قرأ التقرير وقال لها نصا ” الكلام اللي انتى كاتباه ده يعمل مشاكل احنا بنكتب صيغة محددة بنكتب بناء على تذكرة المريض تم عمل اللازم لاتزودى كلمة ولا تنقصي “
راحت المديرة دخلت مكتبها وغيرت التقرير باللى الدكتور قالها عليه وسلمته لمسؤول الأمن عشان يروح مكتب المدير يختمه ورفض انى ادخل وبعدين جابلي التقرير بعد الختم ويقولى كده مطلوب مننا حاجة تانية؟
قولتله بالنسبة للتقرير عشان تأجيل الامتحان _ رغم ان ده مش التقرير الفعلى لحالته _لا تمام
وبالنسبة للاهمال اللى حصل ..
قطع كلامى وقالى حصل ايه فحكيت له
قالى المهم تطمني على ابنك
قولتله اكيد مش مستنية نصيحتكم لكن مكان القطع ده مكان عصب تقدر تقولى لو حصل مشكله اعمل ايه ؟!
قالى تابعى مع دكتور برة وان شاء الله مفيش مشكلة قولتله بإذن الله طبعا ميكونش في مشكلة لكن لو في ؟
قالى يحلها فورا
قولتله ااااه
يعنى سواء في مشكلة أو مفيش فالتصرف يبقي بينى وبين الدكتور اللى برة وبالنسبة ليكم مفيش أى حاجة
قالى أصل احنا مستشفى حكومي
قولتله يعنى مستشفى حكومي
معفية من العقاب فتعملوا اللى انتو عايزينه تستهتروا وتهملوا براحتكم وبمناسبة الماسك اللى حضرتك لابسه لما انتو مستشفى عزل وجالكم حالة جراحة وداخل لابس الماسك بتاعه ولما خرج اللى رافقه للمستشفى بيقوله فين الماسك اللى انت كنت لابسه رد ابنى عليه قاله اتقطع جوة
هو مش من أمانة مهنتكم تحافظوا على سلامة الناس واحد إلتزم ولابس الماسك واتقطع جوة عندكم انتو كمستشفي معندكوش ماسك تدوه له ؟!!
طبعا قالى انى مش هوصل لحاجة معاهم
فالأفضل أشوف ابنى بقي واطمن عليه وخلاص على كده قولتله عايزة اعرفك انى مخترتكوش ولا عمرى هختاركم ولو كنت اتبلغت من بداية الأمر كنت وديته مستشفى تانية لكن للأسف اتبلغت بعد ما جالكم واتخيط فكان خلاص قضي الأمر …
اكتشاف المزيد من الاتحاد الدولى للصحافة العربية
اشترك للحصول على أحدث التدوينات المرسلة إلى بريدك الإلكتروني.
